تعالوا نبيع فلســـطين

تعالوا نبيع فلسطين

راح نزعل سنتين

بس راح نريح بالنا من مناظر التدمير

من مناظر التعذيب و القتل و التفجير

كم أم ضاع ابنها من بين ايديها؟

كم شب ضاع عمره عشان التحرير؟

لو بعناها راح ترجع زي ما كانت فلسطين

ممكن يغيرو اسم فلسطين

بس شو بدنا بالاسم المهم تكون بسلام

بنصير نروحها سياحه

بتصير كلها صياعه و فياعه

ببطل عنا وطن لنحارب عشانه

بنبطل نقعد بالساعات نصمم صور تقطع قلب الصخور

بتبطل دمعة طفل تنزل من الخوف

ممكن يقتلعوا اشجار الزيتون

يزرعو اشواك وزقوم

ممكن راح ننسى ريحة البرتقال و الليمون

بس راح يرجع الامن لفلسطين

ممكن يهدمو الاقصى

وراح ننسى آذانه والصلاه فيه

بس راح يرتاح من التعذيب اللي هو هلا فيه

ممكن يخلو سمانا مظلمه و سكرانه

بس شمسنا ما بتنور الا الفلسطينيه

تعالو نوقع على بيع فلسطين

اصلا شو راح نبيع

جثث ودم وبيوت مهدومه

سيوف وخيول من الانتظار تعبانه

عيون طفل من دموعه متنفخه

صوت شهيد بينادي على رجال خايبه

على ضمائر مقتوله

على نخوه مش موجوده

سجون بالمظلومين مليانه

رمال من دم الابرياء شبعانه

اشعار بالدم مكتوبه

شو بدنا نبيع؟

الألم

الخوف

الذل

القتلى

الاسرى

الشجر

الرمال

الصبر

ولا الوطن اللي بعتوه من زمان

بعتوه لما سكتو على قتل شيوخ اطفال و نساء

سكتو لما انتزعوا وطنا

لما شردونا وعيشونا بملاجئ

لما كنا ننادي وننادي و ماحدا سامع

لما كنا نتعذب والكل خايف منا يقرب

انتو بعتوا فلسطين

هانت عليكم وبعتوها
بس احنا راح ندافع عليها لو كل العالم ضدنا

لو اجبرونا على بيعها بنبيع روحنا وما بنبيعها

ماراح بيع حبة رمل من فلسطين

فلسطين راح ترجع على ايدينا

فلسطين راح ترجع وروسنا راح تضل مرفوعه

فلسطين راح ترجع

والكل يسمع

فلسطين راح ترجع